Selasa, 20 Desember 2011

Pituah Babaso Basi (Sopan Santun)

Randah bilang-bilang disuruak-i
Tinggi kayu aro dilangkahi
Ketek banamo gadang bagala
Manyuruak bungkuak, malompek patah

Pai jo rundingan, tingga jo mupakaik
Bapailah batinggalah
Nan capek tibo dahulu
Nan lambek datang kudian

Muluik manih kucindan murah
Kato dahulu basitinah
Kato kudian basicapek

Indak nan sirah salain kundi
Indak nan bulek salain sago
Indak nan indah salain budi
Indak nan elok salain baso
Budi haluih bak lauik dalam
Muluik manih baso katuju

Nan kuriak kundi
Nan merah sago
Nan baiak budi
Nan indah baso

Cinto ka adaik jo limbago
Mamuliekan sagalo janji
Ilimu banyak pangatahuan dalam
Bak bataburan bintang di langik
Sabanyak kasiak di pantai
Sadalam aie di lautan

Tunduak jo sujuik pado Allah
Maikuik sagalo parentah Tuhan
Samparono iman jo Islamnyo
Malangkok-i sari’aik jo rukunnyo

Pandai baliku di nan tarang
Pandai balinduang di nan paneh
Pandai maambiak patangahan
Pandai maagak maagiahkan
Dibaliak-baliak mangko dibalah

Talangkang carano kaco
Badarai carano kendi
Padi nan samo digantangkan
Bacanggang karano baso
Bacarai karano budi
Itu nan samo dipantangkan

Ilimu padi nan dipakai
Makin barisi makin runduak
Bagaue barandah hati
Muluik manih kuncindan murah
Budi haluih bahaso katuju
Pandai manyasuaikan pargaulan
Indak ditinggikan dirandahkan
Nan tuo dipamuliekan
Samo gadang lawan baiyo
Nan ketek dikasiahi

Dibagak urang kito indak ganta
Karano kito indak pacakak
Dikayo urang kito indak sagan
Karano kito indak mamintak
Dipandai urang kito indak ka batanyo
Karano kito tak ka baguru

Dipangkek urang kito indak malu
Karano kito indak mintak karajo
Dikuaso urang kito indak patuah
Karano kito bukan pisuruah
Dibudi jo baso basi sajo kito nan tunduak

Elok parangai duduak tagak
Bataritik minum jo makan
Tabaokan sopan jo santunnyo
Anggota nan tujuah dipagunokan

Jiko pai kaparalek-an
Duduak tagak ado jangkonyo
Baso jo basi usahlah lupo
Nan tuo didahulukan
Samo gadang dipabasokan

Kok sairiang jo nan tuo
Usah malangkah mandahului
Jiko bagageh dek takaja
Mintak maaf jo karilaan
Mintak tabiak, nak dahulu

Kok duduak di nan tinggi
Sugirolah capek tagak badiri
Mintak baganti tampek duduak
Eloknyo nan tuo nan di ateh

Kok samo makan jo nan tuo
Tunggu dahulu basuah tangan
Kalo dahulu nak sudah makan
Nantikan salasai nan tuo-tuo

Duduak makan jan mancangkuang
Duduak baselo elok-elok
Suok nasi dipaketek
Mangunyah jan mancapak
Jan mangecek sadang makan

Kalo taraso nak mandaham
Paliangkan muko ka balakang
Makan jan banyak-banyak
Napsu paralu dibatehi

Jikok makan bakawan-kawan
Kok nak dahulu salasai sudah
Mintak rila mambasuah tangan
Bao kamuko tampek basuah
Tangan nan jan dicabuakkan
Toyong ka piriang mambasuahnyo
Jari nan jan digalatiakkan

Kok duduak basamo jo nan tuo
Banyak rundiang nan disabuik
Banyak pitua nan didanga
Papatah patitih salo manjalo
Banyak pangaja nan kadiambiak
Dapek baraja indak baguru
Dapek pitua sadang duduak
Bak bilalang dapek di manuai
Bak dapek ikan sadang basiang

Ado pun nan disabuik parampuan
Mamacik taratik jo sopan
Tahu mamakai baso basi
Tahu di hereang sarato gendeang
Mamakaikan raso jo pareso
Manaruah malu jo sopan

Manjauahi sumbang jo salah
Muluik manih baso katuju
Kato baiak gulo di bibie
Laku elok kucindan murah

Dinan dangkek basijingkek
Di nan dalam basisalam

Hiduik bak tumo
Di kain putiah bantuaknyo putiah
Di kain hitam nampaknyo hitam

--------------------------------------------
memahami pituah perlu melapangkan diri, membuka hati
sehingga makna kias dan yang tersurat mudah dipahami

semoga bermanfaat, amin ya Rabbal alamin

pituah ini didapat dari http://www.facebook.com/topic.php?uid=72643121476&topic=13642

Tidak ada komentar:

Poskan Komentar